Afbeelding
Foto: Gerrit Dannenberg

Gerard Voortman

Algemeen

Hoondebelasting

Ene van de meest earlijke regels binnen belastinglaand is det de vervuiler, de gebroeker, betaalt. A'j ginnen auto hebt, betaal iej gin weagnbelasting en ook gin accijnzen biej het gebroek van benzine. Aj nit rookt, betaal iej ook nit vuur de belasting dee op een päkn segretten zit.
Hoondebelasting is ook zon vuurbeeld. A'j ginnen hoond hebt, betaal iej gin hoondebelasting. Aj wál zonnen smeargen drietebaas hebt en den oaweral loat drieten, betaal iej der wál vuur. Netuurlijk zeent der oetzeunderingen mear ik kenne der mear weainig. De meeste hoondebezitters loat 'n hoond oet, weet woennear at'e mut en kiekt dan heel ofwezig de roondte in, um vervolgens 'n hoond milden op het gemeentegazon te loat drieten. Iej zeet der ook mear heel weainig met zo'n gekluurd plastic zäkn um den köttel op te rumen, de meesten loopt gewoon verdan en kiekt oe skoapachtig an.
Vake zeet het ook gin échte hoondeleefhebbers, mear hebt ze nen hoond umdet det 'leuk' is of umdet de wichter het zo mooi veendt, of gewoon um der biej te heurn. Ik heb miej loaten vertellen det vuural dee léchtgelle driete koomp duur gekoop voor. Det zeent dus leu det at feaitlijk niks oawer hebt vuur nen hoond en ze um voort met gekoop hoondevoor.
In Almelo schaft ze de hoondebelasting of. Onbegriepelijk, want Almelo kan elken euro good gebroeken en dan stopt ze met hoondebelasting umdet det ne 'ordinaire bron van inkomsten vuur de lokale overheid is'. Ze verget het opzoegen van dee hoondedriete biej hondetoiletten heupe geeld kost, ze verget ook het oetglieden van leu oawer zonnen gelligen köttel en een been brekt, de gemeenskop haandevol geeld kost. Ze verget hoe asociaal het is det wichter dee at mooi vuurboeten an het spöln zeent, duur den driethoop hen loopt en gloepens smearig in 't hoes komt.
In Almelo zengt ze det hoondebelasting stamt oet de tied van det nen hoond een trekdeer was en doarumme achterhaald is. Wat onmeunig dom nöalen. Juust in déé tied was nen hoond nuttig en toen was het miskien zelfs nit netjes um hoondebelasting te heffen. Op dit momeant hebt allenig de leu dee at het köant betaaln nen hoond en is het mear as logisch det ze vuur al den oawerlast an de gemeenskop betaalt.
Mu'j toch eens noagoan: hebt oewne wichter de zommerdag mooi vuurboeten espeuld, en komt ze wier met grote kladden en veagen driete op de kleare. Deankt vuural ook eens dee ribbelzoln woer a'j nen halven dag met gangs zeent um dee vaske driete met nen spieker der wier oet te porken.
Verdreedubbeln dee hoondebelasting!!!

Afbeelding
Column: Härte van oons dörpien: zîej hebt 't käts verknald 10 uur geleden
Afbeelding
'Van mijn kleinkinderen krijg ik veel inspiratie' 12 uur geleden
Afbeelding
De Paashaas op bezoek! 14 uur geleden
Afbeelding
ColumLicht balsemen 16 uur geleden
King Stage
Volledige line-up Dauwpop 2024 bekend: Donnie, The Horse Company en Michelle David & The True-Tones toegevoegd 16 uur geleden
Inwoners kunnen een bijdrage aanvragen om mee te kunnen doen met sport, cultuur, onderwijs en maatschappelijke activiteiten.
Meedoenregelingen: voor een extra steuntje in de rug 18 uur geleden
Afbeelding
Ontdek het avontuur: de ZorgSaam Reggedaltrail 20 uur geleden
De feesttent staat al klaar voor het feest tijdens het paasweekend.
Traditionele trekkerslep tijdens Feestweekend Marle 27 mrt, 17:45