Pinn´n
Noa de crisis is ´t eigenluk nooi weer goed ´ekömm´n met de baank´n. Ok de Rabobaanke in Nijverdal heft ´t zoer, pas hebt ze de tente an de Willem Alexanderstroate verkoch en bint ze verhuusd noar ´n kantoortje an de oaverkaante van de stroate. Ie mut wel goed kiek´n, ie loopt er zo langs. Ma ach, wat maakt ´t uut, zovölle he´j doar nie meer te zuuk´n, zelfs de pinapparaat´n bint vot.
Ma doar hef de Rabobaanke, creatief as ze bint, wat op bedach. Ze hebt ´n soort van zeekonteener op de markt ´ezet, doar ku´j pinn´n. Det lek mooi, ma a´j wilt pinn´n mu´j wel ´n snipperdag nemm´n, want vake stiet er ´n eumeunigen rieje volk te wach´n. Wat wo´j ok met één pinapparaat. Verget ok nie ´n jas an te trekk´n, want ie stoat doar kats op ´n toch en as ´t rèngt bie´j hemoal doodongelukkig.
De baanke vroag´n um ´n kroam rond den konteener te verbetter´n hef gin zin. Ze betaalt zich al hemoal schel an bonussen en det soort dinge, ´t geld is op. Bie de gemeente anklopp´n ku´j ok vergett´n, die hebt noa alle trammelant in ´t ofgeloop´n joar ok gin cent meer um ´t gat te kramm´n.
Er blef niks aan´s oaver dan zelf in actie te komm´n. Misschien is ´t wat um ´n oale partietente nös den Rabokonteener te zett´n, dan stoa´j in ieder geval dreuge. Wie trekt ´n paar vrijwilligers an die koffie zet en tied hebt um de probleem´n met oe schoonmoe te besprekk´n. Op die maniere krie´j weer zin in pinn´n, of nie dan.
O ja, pas wel op a´j met ´n auto komt, veurda´j ´t in de gaat´n hebt loat keals in blauwe pakken oe 90 euro biepinn´n. Ie kunt nie gangs bliem´n.
Doe ´t hènig an,
Jan