Lig ’t an mie?
Die vroage stel ik miezelf steeds vaker. Soms komt er in de media van die dinge langs woar ‘j van zegt: ‘Lig ’t an mie of eh…?’
Ie hebt vaste den kroam rond de kinderopvangtoeslag wel met’ekreeg’n. Olders die deur de fiskus zomaar e’m van fraude wön’n beticht. Noa völle gedram kreeg’n de olders hun dosjees in huus, ma zo’n bitje alle tekst was zwat’elakt. Die olders natuurluk gloepens hellig en ze kreeg’n geliek, de fiskus mos dreks opholl’n met det zwatlakk’n. ’n Paar wekke terugge ko’j in de kraante lèzen dat de fiskus de dosjees nie meer zwat oflakt, nee, noe is ’t wit… Zo’n artikel les ik drie keer en vervolgens twiefel ik an miezelf. Lig ’t an mie of eh…?
Rie’j in ’n elektriesen auto? Rap inruil’n veur ’n diesel, want binn’nkot betale wie oons hemaol skel an energie. Het stroomnet lig zo gangs te gluui’n in de stroate en mut rap vervang’n won’n. Joa, want ’t oplaad’n van tien auto’s vret net zovölle stroom as honderd huusholding’n bie mekaar. Goetegoet, ‘n paar warmtepomp’n bie en ’t lich giet uut. Lig ‘t an mie of eh…?
De gemeente Hell’ndoorn hef veurig joar nogal wat finansjeele stekk’n loat’n vall’n, ze komt dikke tekort. Dus vroagt ze heel fesoenluk an de inwoners of ze asteblief 25% meer OZB-belasting wilt betaal’n. ‘Nee’, zeg de inwoner, ‘doar ku’w nie an beginn’n, ’t kost amoal a zat.’ ‘Ma wie doet het wel.’ zegt de gemeente. Kiek, ok op zo’n moment zakt mie de bokse of. Lig ’t an mie of eh…?
Wat Nijverdal betreft, ’t hef ’n paar cent ‘ekost, ma centrum is in de leste joar’n wel heel mooi e’wön’n, of nie dan. Op die pearse bakk’n in ’t centrum noa dan, ’t is toch gin gezichte. Ma det kan ok an mie ligg’n.
Doe ’t hènig an,
Jan