Mondkapjes
Keal, het giet toch nargens aan’s mear oaver.
De kraante, de radio en tellevisie, ’t is mondkapjes veur en mondkapjes achter.
Noa moandenlang geouwehoer blek noe toch dat ‘t better is da’j zo’n ding opzet, hoewel oons aller RIVM hef ‘ezeg dat die dinge hoaste gin effect hebt.
Ma in dit geval hef ’t RIVM ongeliek, ik kan oe vertell’n dat die dinge wel effect hebt.
Noadelig effect, det wel.
Ofgeloop’n moandag mos ik bie ’n dokter de bloeddruk loat’n mett’n. De assistente vun ’t ammoal nogal an de hoge kaante en stak ’n hele preke of. Noa ofloop vreug zie mie of ik ok nog aandere klachen had. ‘Joa,’ ze ik, ‘k heb las van ‘n accute gehoorstoornis.’ Ik legg’n heur uut dat ik zowat niks van de preke had met’ekreeg’n deur het mondkapje wat zie veur had. De assistente kreeg troan’n in de oog’n, ma ik kon nie zien of zie achter ’t mondkapje zat te lachen of te brull’n.
Noa ‘t bezuuk an ’n dokter mos ik nog rap e’m noar de Aldi veur ’n paar bosschopp’n. En joa heur, zo’n bitje iederene in ’n winkel had ’n mondkapje op. ‘Goedemorgen!’ ze ik teeg’n ’n vrouwe met ’n gebloemd kapje. ‘Grp..us..pt’ kreeg ik as antwoord. Ik goa der vanuut dat die vrouwe mie vanachter heur gebloemd geval ok vriendelijk begroet’n, ma veur ’t zelfde geld zeg zo’n portret ‘goat asteblief hen met oen gedram en knupt oe rap ’n kappe veur’.
’n Haand geem’n en ’t elleboog’nwark is zo gangs iets van veur ’n oorlog, wie blieft op anderhalve meter ofstaand van mekaar. Doar kump noe het mondkapje bie. Ma deur ’t mondkapje ku’j mekaar zowat nie mear verstoan en ku’j ok nie inschatt’n hoe ’n aander zich vuult.
Lichamelijk en geestelijk zakke wie steeds verder vot, doarum denk ik dat sommige maatregel’n weer wat versoepeld mut word’n.
Misschien kan ’t RIVM is uutzuuk’n of wie mekaar weer kunt kussen. Kussen met ’n mondkapje op en de hand’n op de rugge. Ik denke wel dat ’t helpt.
Past goed op en doe ´t hènig an,
Jan