Onfesoenluk
’t Ofgeloop’n halfjoar hef dudeluk ‘emaakt hoevölle fesoen wie met mekaar in de butte hebt.
A’j ’t mie vroagt valt det nogal teeg’n. Nemt noe de mondkapjes, da’j zo’n ding ophebt is natuurluk prima, ma maakt van ‘n mondkapje gin grondkapje deur die dinge zomaar van oe of te gooi’n. Het lek toch waarachtig nargens op, ie ziet die dinge oaveral slinger’n. Opruum’n? Iederene löp ter met ’n groot’n boch umhen, die dinge zit natuurluk katsvol virussen, ie zol’n oe toch ik weet nie wat op ’n haals haal’n. Nee, mooi loat’n ligg’n, die keals van de gemeente ruumt ‘t wel op, die kriegt doar trouw’ns ok veur betaald. Hoe onfesoenluk wo’j ’t hemm’n?
Wee’j wat ok onfesoenluk is? Al det commentaar op Rutte en det aandere volk in Den Haag. Die luu warkt zich ’n noad uut de bokse en probeert met vall’n en opstoan er ’t beste van te maak’n. Ma der bint altied van die luu met ’n zwemdiploma die het völle better weet en op Feestboek as gekk’n tekeer goat. Goat toch asteblief hen en holt oe fesoen.
'Alleen samen krijgen we corona onder controle'. Det klinkt mooi, ma soms denk ik da’j het woord ‘samen’ better kunt schrapp’n. Veural as ’t um WC-papier en paracetamol giet, dan is de saamhorigheid en controle verre te zuuk’n. Dan valt alle fesoen vot.
‘t Personeel in de zorg hef ’t zoer, ma der bint luu die doar gin bosschop an hebt. Det volk denkt dat ze ’t rech hebt um bie ’n dokter, in ziek’nhuuze en teststroat’n ’n groot’n bek op te zetten. Völle onfesoenlukker kan ’t toch nie?
Deur ‘t coronavirus zol ’t lem’n in de komm’de tied nog wel es ’n stuk zoerder kunn’n wonn’n dan dat ‘t noe al is. Loat wie die tied op ’n fesoenlukke wieze met mekaar zien deur te komm’n, misschien dat ‘t dan met ’n zoergroad ok wel metvalt. Luu met ’n bitje fesoen in de butte mut det kunn’n snapp’n, of nie dan.
Past goed op en doe ´t hènig an,
Jan