Column Gerrit Kraa: Röste

Röste

Hè, hè, de vekaanties zit der non wal wier zon betje op. Tied um op het woark tot röste te kommen. Want vekaantie betekent rechtervoort da-j alderbarstend hatte mut woarken. Iej magt nit mear kets niks doon, ook in Tweante nit. As toerist kiek iej eers op internet woedöanig ie oe in Tweante mut gedreagen. Dat betekent: dreks in de bene springen as iej op een terras de naam FC Twente heurt of Héracles of Herácles of Excelsior of Errevee en dan goa'j stoan a'j vuur Twente zint. Dan zi'j pas welkom. Iej mut kiezen oet alle meugelijke activiteiten. Op deenkseldag he-j gengeldag en heujvorken-smiet-dag. Op gozendag goa-j drèk-trean of wasken in nen fenuuspot, op doonderdag kö-j met nen döskestok tegen de reagentonne howwen of met ne sukerbiete vuur de koonte lopen of köttelken drejen. En zo is der alle deage wal wát. En dan goa-j fietsen. De boerenkloompenroute, de gierkettelroute, rondjes-um-de-koarkenroute, het filistijnenpad of de mulle-zaandroute. Iej fietst roond met ne fietse met ne speciale klemme op het steur met ne knooppeuntenroute en ne speciale klep-pette op 'n kop met zo'n loch-gat achterin, bliekboar vuur de airco of um der spinazie in te zejen. En dan kö-j noar een restauraant um wat te etten. Op de toafel lig zon vel papier, det neumt ze doar nen place-mat. Dat mu-j eerst duurleazen. Dat geet oawer het verleden van het restauraant, oawer nen crimineel den doar oonder het terras begreawen lig, oawer de kreentenwegge, den ze met nen specialen oudheidkamerkreentenbuks vol-eskötten hebt met roziens en sucade. Iej bestelt nen biefstuk met een poar snie stoete der biej. 'n Ober nikket en vrög nog: aans nog? Joawal, een gleaske zompen-, of klompen-, of hompen- of lompenbitter. A-j dan deankt da-j röste kriegt, he-j het mis. Nen goodn Tukkersen kelner keump vief keer wierumme. De eerste keer vrög-e: blood, halfumme of dood? Iej mut dan angewen of 'n biefstuk rauw mut wean of medium of goed doorbakken. Doarnoa nog ne keer: witte stoete of kuch? Dan nog o-j 'n bitter oet de ieskaste wilt of gewoon. En dan nog hef 't esmaakt? Hef 't biefstukje stille eleagen op 'n tealder? Nog ijs van het huis, misschien? A-j 't etten ophebt, mu-j 's oawnds op de camping nog metdoon an alns woer a-j thoes nit oawer prakkezeert: bingo, kloot- of boog-sketen, Fraanske bälle smieten, pielkes gooien, verbraand vleais etten, en weet ik völle. Gin woonder da'j bek-of thoeskomt. Dan wordt het tied vuur het Tweantse mantra-beukske. Bladziede 1: goat prewwelen in oew höfke en herhaalt honderd moal: doot heanig an-goodgoan, doot heanigan-goodgoan. Zö'j ees zeen hoe rap a-j dan bettert. Doot heanig an, good goan!