Column: Elk bördtien uut ‘t servies vertelt zien ègen verhaal

In 1820 kreeg oonzen koning Willem I veur zien verjaordag ’n prachtig geschenk van vrouwe en wichter. Zîe gaeven ‘m ’n dessertservies det uut 352 bördties besteun. Det is best völle veur ’n servies. Iej mudt d’r nîet an dèènken de-j al det spul mudt ofwassen.

Het servies wördt echter pas echt mooi a-j naor de ofbeeldings kiekt. Het hele Koninkrijk der Nederlanden is d’r met kastelen óp of-ebeeld. Het koninkriek wat noew Nederland en België is. Het besteun nog maer net en het was neudig umme de baanden met alle femiliejs die belangriek waeren veur ’t hof in Den Haag in alle hôeken van ’t laand dudelijk te maken.

Elk bördtien uut ‘t servies vertelt zo zien ègen verhaal en zal veur d‘n koning de neudige herinnerings óp-ereupen hebben. Het servies was dus niet allîenig maer functioneel umme regelmaotig te gebruken, ‘t was tegelieke een culturelen schat vól met historische betekenis.

Zo kump ook Aoveriessel an bod. Hier kump nen persoonlijken baand tot uutdrukking den koning Willem met zienen opperstalmeister Van Heerdt van ‘n Eversbärg häd. Nen opperstalmeister was verantwoordelijk veur alle verplaatsings van d’n koning en zien hof. Nao een opperhofmaerschalk was een opperstalmeister een van de belangriekste lûu an ’t hof. Van Heerdt häd aaltied trouw ópdrachten veur Willem vervuld. Îen van ziene belangriekste ópdrachten was ziene reize in 1815 naor Sint-Petersburg te hope met oonzen laeteren koning Willem II. Van Heerdt mós naemens koning Willem I d’rveur zörgen det Anna Paulowna met Willem II zól gaon trouwen. En wisse, det is ‘m elukt.

Det nen Eversbarg stîet of-ebeeld benaodrukt daormet nen persoonlijken baand tussen d’n koning en zienen trouwen opperstalmeister. Veur oons is det dan weer machtig mooi umde-w óp disse meniere d’n Eversbärg in kleur könt zîene. ’t Kereltien óp ’t peerd zal wisse den opperstalmeister zölf uutbeelden. De vrouwe meugelijk ziene twîede echtgenote Esther Renouf den hij óp îen van ziene reizen naor Engelaand óp-edaon häd. Ook kö-j zîene det róndumme ’t huus ne brede grachte lag. Ook zîe’j de toegangsbrugge aover de grachte met daorachter ne klène veurplaetse umzeumd met an beide kaanten grote beume. ’t Zal een veurnaemen entree naor ’t huus wèèn ewes waor ook nen koning zich best kón vermaeken.

Werkgroep Oald Niejs sprokkel’n van de Historische Kring Hellendoorn-Nijverdal verzamelt historische verhalen en beelden, waarover Evelyn Ligtenberg maandelijks een column schrijft.