Column: Goat hen fietsen

Mangs pak ik miezelf hard an, zo ok ’n wekke of wat terugge. ‘Keal, kom toch es keer met det luie gat uut den auto en goat hen fietsen.’

Amoal goed en wel, ma dan mu’j wel ’n fietse hem’n. ‘k Had net ’t vekaansiegeld binn’n, dus ’n fietse anschaff’n was hemoal zo gek nog nie. ‘k Zag bie fietsenmaker Jans op Nijverdal ’n mooie en beunige fietse stoan, det leek mie wel wat. ‘Wat kost die fietse?’ vreug ik Jans. ‘Stiet ter op,’ z? Jans met ’n uutgestrekk’n gezichte, ‘3800 euro, zonder fietstasse.’ ‘k Sleu zowat achteroaver, 3800 euro veur ’n fietse, hoevölle gekker wo’j ’t hemm’n? Jans rettel’n vedan met: ‘Hij hef ’n aktieradius van 120 kilometer, ’n snellader, ‘n kompjoeter…’ ‘Holt toch op keal,’ z? ik, ‘3800 euro, doar koop ie ’n auto veur.’

’s Middags bell’n mie moe mie op en wie kreeg’n ’t ok oaver de fietse van 3800 euro. ‘Haalt miene fietse ma op,’ z? mie moe, ‘ik doe d’r toch niks meer met.’ ‘k Heb de fietse op’ehaald en, ie geleuft het nie, veur ieder’n bosschop zat ik op de fietse. Goetegoet, of det rap ging, ik wis nie wat mie oaverkwam. De luu op Nijverdal trouw’ns ok nie, die vleug’n alle kaant’n op as ik ter an kwam stoem’n.

Ma ‘n aktieradius van de fietse veul eumeunig teeg’n, met zo’n 20 kilometer was ’n accu kats lög. Dus ikke weer noar Jans hen. ‘Joa,’ z? Jans, ‘der mut ’n nieuw’n accu in, det kost 500 euro.’ ‘k Sleu aweer zowat achteroaver, 500 euro veur ’n accu?

Ze zuukt het ma uut. ‘k Goa met ’t luie gat wel weer in ’n auto. Met 500 euro heb ik ’n aktieradius van 5500 kilometer. En ’n kofferbak in plaatse van ’n fietstasse. 500 euro, goat hen fietsen.

Doe ´t hènig an,
Jan Ebeltjes

Meer berichten
 
Auto zoeker