De bruudskôe kö-j zîene as soort van startkapitaal
AlgemeenHELLENDOORN - Of en tôe krîege wiej as wärkgroep Oald Niejs Sprokkeln uut een ärfenisse wat mooie foto’s tôe-eschöven. ‘Daor könt iejlûu vaste wel wat met’, is de opmärking daor dan biej.
En wisse, daor hebt ze geliek. Wiej bint d’r machtig bliede met. Een paer maond eleen krege wiej foto’s uut de naolaotenschap van Hanny en Henk Schuttevaar-Klein Roseboom. Prachtige foto’s van eer boerderieje Sniederboer in Eelen, maer ook toen d’r nog eboert wörden deur Klein Roseboom an de Dorpsstraote, direct nööst de aolde kärke.
Bruudskôe
De foto biej dit stukkien laot echter een gebruuk zîen det zo tôeverdan in onbruuk raekt. De bruudskôe. Het is een aolde gewoonte det de vae van de bruud zien óp îene nao beste jónge kôe, nen veersen, metgaf as zienen dochter ’t huus uut gung umme te trouwen. Iej könt ’t zîene as ’n soort van startkapitaal. Daornööst häd d’n dochter meestentied nog wat linnengôed en huusraod biej mekaer e-spaord.
De kôe kreeg een strikkien umme en wörden in óptocht deur de naobers naor de boerderieje van d’n breugeman ebracht. Natuurlijk wörden ‘t beest daor nîet zomaer of elèverd. Det kostten de femiliej van de breugeman natuurlijk d’n neudigen fôezel. De kôe mós zogenaemd nog effies extra ekeurd wörden. En hoe kö-j det better dôene dan met een glaesien fôezel an de lippen? As iederene ’t d’r uuteindelijk met îens was det de kôe d’r met deur kón, dan wörden ziej op stal ezet. Vervolgens wörden d’r met een leste glaesien op eer e-proost.
Baogen
En det is nîet ‘t enige waor de naobers druk met waeren. D’r mos grûunigheid kommen umme ‘n baogen te zetten biej de wónnige van de jónggehuwden. Daor wörden ‘t manvolk veur ’n bärg in e-stuurd. En de vrouwlûu maekten ondertussen reusies van pepier umme d’n baogen met te gaon versieren. Met het ópzetten van ’n baogen gung naor gôed gebruuk vanniejs de flesse met fôezel rónd.
En de kôe? As ‘t gôed gung, steun den netties op ’n stal en leut alle gedôe rustig herkauwend aover zich hen kómmen. Wel was zîe gôed vaste ezet. Want stel det de kôe de bîene zól nemmen en terugge zól lopen naor d’n aolden stal. Det zól nîet völle gôeds veur de trouwerieje betekenen.
Tekst: Evelyn Ligtenberg
